“Ẹ̀ṣẹ̀ Lekan, awakọ̀ Fatinoye ju tí Judasi lọ, gbogbo ẹbí ló dá lóró”

Oloye Jiboku tẹsiwaju pe “Ọjọ ti Lekan ti de, ni mo ti mọ ọn mọ iyawo, ni bii ọdun 2018.

Iyawo yii ko fi han si awa ọrẹ ati ojulumọ wi pe boya awakọ ni. Niṣe ni wọn mu Lekan gẹgẹ bi ọmọ.

Lekan jẹ ẹni ti a ko tete mọ wi pe oṣiṣẹ ni, nitori ohun ti ọmọ wọn ba jẹ lo maa jẹ. Gbogbo ohun ti a wa n gbọ lasiko yii lo n jẹ kayeefi fun mi.

“Ni nnkan bi ọjọ marun si asiko ti wọn maa ku, ibi ti a ti n sọrọ yii la wa, ti iyawo si pe Lekan wi pe ko tete lọ bu ounjẹ, ko to di pe Oreoluwa, to jẹ ọmọ wọn de.

Mo wa nibẹ ni, wọn ko sọ fun mi. Wọn gbe gbogbo ara le.

Ko si ohun ti wọn n ṣe ninu ile, ti ko han si Lekan, ti emi si mọ si, sugbọn ile aye la ri yẹn, bi iku ile ko ba pa ni, t’ode ko le pa ni.”

Bakan naa ni Jiboku fikun pe “Emi gẹgẹ bi eeyan kan, mi o mọ iru epe tabi ọrọ teeyan le sọ si Lekan, ju ko dakẹ, ko maa wo lọ.

Ti wọn ba lọ si ode ayẹyẹ, ti Lekan ba da joko sinu mọto, iyawo maa pariwo le e lori ni pe ko maa bọ wa jokoo lẹgbẹ oun.

Kii ṣe ẹẹmeji ọtọọtọ ni wọn ti ṣe e loju mi. Eyi lo fa a to fi jẹ pe gbogbo awa ti a sunmọ wọn, ko si nnkan ti a le ṣe fun Lekan ju ka ba wọn tọju ẹ lọ.

Ṣugbọn ta lo mọ pe iranṣẹ eṣu ni.

Mo ri Lekan gẹgẹ bi ẹni to ni iwa irẹlẹ, tori pe kii sọrọ, o jẹ ki n tun wa ni oye wi pe, kii ṣe gbogbo eeyan la n gbe ara le.

Ẹni to jẹ ọmọ Ọlọrun gan-an lasiko yii, mo maa sa fun un, ko si ẹni to le mọ pe Lekan le ṣe ijamba, kii ṣe ẹni ti eeyan le ri, to le na ika aburu si.

Nigba ti oun naa n sọrọ lori iku ẹbi Fatinoye, ọkan gboogi lara awọn alabasisẹpọ Kehinde, tii se ọkọ, Rasheed Fajimi naa gbarata lori bi wn se da ẹmi rẹ legbodo.

Fajimi ni “Ọrẹ mi ni Oloogbe Kẹhinde Fatinoye jẹ. O ti to ọgbọn ọdun ti emi pẹlu Kẹhinde ti mọ ara wa.

A jọ bẹrẹ iṣẹ ni banki CBN to wa ni Abẹokuta ni, ko to di pe a lọ si Eko. Latigba naa la ti jọ wa, ko to di pe nnkan to ṣẹlẹ yii ṣẹlẹ lọjọ akọkọ ninu ọdun.

Lotitọ, onikaluku lo maa sọ ohun ti wọn ba ri, otitọ ibẹ ni pe, Kẹhinde ṣi n ṣiṣẹ lọwọ, ko tii fẹyinti.

Ọdun 2025 lo ṣẹṣẹ maa fẹyinti. Kẹhinde jẹ ẹnikan to jẹ pe ti ẹ ba ba nnkan to n dun yin lọ s’ọdọ rẹ, ẹrin lẹ maa ba kuro.

“Ipa to ko ninu igbesi aye mi, gẹgẹ bi ọrẹ, ko kere rara, o mu ile aye gẹgẹ bii pe ko jẹ nnkan teeyan le wa mọ aya.

A ti di ọrẹ bi ọmọ iya, eeyan ko le rin, ki ori ma mi, ṣugbọn kii ṣe bi ki ẹ ba iranlọwọ lọ sọdọ, ko sọ pe ko si.”

Ẹgbọn Kehinde Fatinoye ti oun naa sọrọ nibi isin imọyi naa kede pe oloogbe gbiyanju fun gbogbo ẹbi rẹ, ki wọn to da ẹmi rẹ legbodo laipe ọjọ.

O gbiyanju fun awa mọlẹbi ati ọrẹ. Ko si ẹni to maa sunkun de ọdọ ẹ, ti ko ni ba ẹrin pada. Igbakeji alakoso ni Kẹhinde ni ẹka to wa.

Kẹhinde lo ran akọbi mi lọ si fasiti ipinlẹ Delta jade. Ọmọ mi keji naa, Kehinde lo n ran an lọ si ile ẹkọ gbogboniṣe t’ipinlẹ Eko.”

Bakan naa ni Zaccheus Fatinoye tii se abiro oloogbe salaye pe o ku ọsẹ keji ki wọn pa ẹgbọn oun, lo ra foonu tuntun fun mi

O ni awọn marun-un lawọn obi wọn bi, akọbi wa ti ku, ẹni to ṣikẹta ni Kẹhinde ti wọn pa yii.

O ni ibanujẹ nla ni iku Kehinde jẹ fun oun,nitori ẹni to n ran awọn lọwọ ninu mọlẹbi niyẹn.

“Kii ṣe pe mi o ṣiṣẹ, ṣugbọn bi mo ba ni iṣoro to fẹ ga ju ẹmi mi lọ, ẹnikan ti mo n sare lọ ba niyẹn.

Inu oṣu kọkanla ni ẹgbọn mi gbọ pe mo ra ilẹ si agbegbe Ilogbo, wọn si pe ẹni to ta ilẹ fun mi, wọn si fun ẹni naa ni ẹgbẹrun lọna ẹẹdẹgbẹta naira gẹgẹ bi owo bulọọku lati fi kọ ile naa.

Ka ni mo tete sọ ni, maa ti pari ile naa. Ọjọ kẹrindinlogun, oṣu kejila, ọdun 2022 ni ẹgbọn mi tun ra foonu fun mi.

Titi aye ni ma maa fi ranti ẹgbọn mi. Awọn ni wọn ran ọmọ mi lọ si ileewe giga, bẹẹ ni wọn tun n fun ọmọ naa ni ẹgbẹrun mẹwaa naira loṣooṣu.

Nnkan ti Lekan ṣe yii, kọja ohun ti Judasi ṣe fun Jesu. Gbogbo ẹbi lo da loro”

Ẹgbẹ African Christian Fellowship ti oloogbe Kehinde Fatinoye wa ninu rẹ naa sọrọ nibi isin imọyi rẹ.

Ọgbẹni Sanmi Ogundele to jẹ ọmọ ẹgbẹ naa ni Oloogbe ni aarẹ ẹgbẹ lati bii ọdun mẹfa, tawọn si ti setan lati bẹrẹ akanse isẹ ti wọn n se lọwọ pada ninu ijọ naa, ki iku to mu lọ.

“Ẹni ti kii ta ẹnikẹni nu lawọn oloogbe yii jẹ. Iwa ọmọluabi si wa lara awọn mejeeji. Ko sẹni to le dahun bi ile naa ṣe jona.

Emi ni mo pe Lekan, awakọ wọn pe ko wa si ile naa, nnkan bi aago mọkan si mejila ni lo de.

Bo ṣe de ni ọga ọlọpaa beere pe ṣe awakọ wọn niyẹn, wọn si ba a sọrọ.

Igba ti wọn sọrọ tan, ni wọn gbe e lọ teṣan. A ko mọ pe oku wọn wa ninu ile.

Igba ti aburo oloogbe, to jẹ n Ṣeyi de, la to mọ pe oku wọn wa ninu ile.

Mo mọ Lekan daadaa, mo mọ adugbo ti Lekan n gbe ni Oke-Lantoro niluu Abẹokuta.

Ile mi ni ni gbogbo wọn ti ṣe ayeyẹ ọdun keresimesi, Lekan ti ba nnkan jẹ gidi, ko ni atunṣe mọ.

Ki ijọba ṣe ohun to tọ, ati eyi to yẹ lori ọrọ yii, nitori pe gbogbo agbaye lo ti mọ ohun to ṣẹlẹ yii.”