Wo ohun tó ṣẹlẹ̀ nígbà tí EFCC ya wọ òde àríyá àwọn afurasí ọmọ Yahoo 127 l’Ondo

Aworan awọn afurasi ọmọ Yahoo

Oríṣun àwòrán, EFCC/Facebook

Ajọ EFCC to n gbogun ti iwa ibajẹ ni Naijiria ti fọwọ ofin mu afurasi onijibiti ori ayelujara 127 ti ọpọ mọ si ọmọ Yahoo ni ode ariya wọn niluu Akure ni ipinlẹ Ondo lọja Abamẹta.

Gẹgẹ bi atẹjade ti EFCC fi lede loju opo Facebook ati X rẹ, ni ode ariya ti wọn n pe orukọ rẹ ni ‘’Signature’’ ati Abah Clubs’’ l’Akure ni ọwọ ti tẹ awọn afurasi 127 ọhun.

EFCC ṣalaye pe iṣẹ iwadii fihan pe Ọjọru ọjọ karun un oṣu Kẹfa yii ni wọn fẹ ṣe ariya naa tẹlẹ.

Amọ, wọn sun un siwaju si ọjọ Satide nigba ti wọn ro pe awọn ẹṣọ EFCC le ma raye lati tọpinpin wọn.

EFCC ni awọn afurasi ọhun ti n ṣe iranwọ fawọn ẹṣọ ajọ naa lori iṣẹ iwadii wọn.

Lara awọn nnkan ti ajọ EFCC gba lọwọ awọn afurasi naa nibi ode ariya ọhun ni ọkọ olowo nla mẹwaa, ẹrọ ibanisọrọ.

Awọn nnkan mii ti EFCC tun gba lọwọ wọn ni ẹrọ kọmputa, alupupu, ago ọwọ atawọn oniruuru iwe to lodi sofin.

EFCC ni gbogbo awọn afurasi mẹtadinlaadoje yii pata ni yoo foju ba ile ẹjọ ti iwadii ba ti pari lori wọn.